سب سے عظیم تر دعا صل علی محمدٍ
ان پہ درود بھیجنا صل علی محمدٍ
صَلِّ عَلیٰ نَبِیِّنَا راہ میں ہے خرد جہاں
حیرتِ علم حق رسا صل علی محمدٍ
آئنۂ ازل ہیں وہ ، آئنۂ ابد بھی وہ
ان پہ نگاہِ کبریا صل علی محمدٍ
دیکھا کسی نے کب کہیں ؟ ایسا کوئی زمیں نشیں
جس پہ ہر آسماں فدا صل علی محمدٍ
ان پہ درود بھیج کے عجز نے پائی آبرو
حِلم و ادب کا قد بڑھا صل علی محمدٍ
عقل کی علم سے رہی بحث ہی بس درود پر
ذکر کا ہے کہ فکر کا صل علی محمدٍ
ان پہ درود میں نہاں راز و خبر کے درمیاں
اور ہے اک مکالمہ صل علی محمدٍ
کس میں ہے دم ؟ کہ شمع پر سوختہ جانِ عشق سے
پوچھے درود یہ ہے کیا ؟ صل علی محمدٍ
ظن سے یقیں نے ہر پناہ ان پہ درود میں ہے لی
جذب و جنوں کی التجا صل علی محمدٍ
ہیں سرِ دست اشک بس، دل کو یقیں کہ ہیں یہی
دُرِّ درود در کشا صل علی محمدٍ
ہیں درِ رحمت ِ علی اٰل محمدٍ پہ سب
فیضِ مودت ! اے خدا ! صل علی محمدٍ
آصف! ابھی جو نکہتیں تجھ کو درود سے مِلِیں
کیوں نہیں سب میں بانٹتا ؟ صل علی محمدٍ
